„Mér sýnist stefna í að það verði metfjöldi áhorfenda og rífandi góð hátíðarstemning á öllum. Við hlökkum til og eigum von á skemmtilegum leik og munum gera okkar besta til þess að umgjörðin verði eins góð og frekast er kostur,“ sagði Vilmar Þór Bjarnason, framkvæmdastjóri handknattleiksdeildar ÍBV í samtali við handbolta.is fyrir stundu en hann er í óða önn að búa sig undir fjórða úrslitaleik ÍBV og Vals á Íslandsmótinu í handknattleik karla sem hefst í íþróttamiðstöðinni í Vestmannaeyjum klukkan 16. Takist Val að vinna leikinn tryggir liðið sér Íslandsmeistaratitilinn.
„Miðasala í gegnum smáforritið Stubb hefur verið umtalsvert meiri en á sama tíma á sunnudaginn fyrir aðra viðureign liðanna. Svo útlitið er gott,“ sagði Vilmar Þór sem reiknar með að allt að 800 áhorfendum, eða eins og húsið rúmar. Komið hefur verið upp aukastúku fyrir aftan varamannabekkina til þess að mæta fleiri áhorfendum en stundum áður.
„Þessa stundina erum við að byrja að kveikja upp í grillinu og koma upp hoppikastalanum fyrir utan íþróttamiðstöðina, en upphitun fyrir stuðningsmenn hefst klukkan 14. Þar verður auk grillmats og drykkja boðið upp á lifandi tónlist,“ sagði Vilmar Þór hefur í mörg horn að líta um þessar mundir.
Herjólfur sem lagði af stað frá Landeyjarhöfn klukkan 13.15 var troðfullur af farþegum og ljóst að stór hluti þeirra er á leiðinni á leikinn. M.a. er fjölmennur hópur stuðningsmanna Vals en félagið stóð fyrir hópferð.
Sem fyrr segir þá hefst leikurinn klukkan 16 og getur orðið sá síðasti á milli liðanna. Vinni Valur leikinn fær liðið afhentan Íslandsbikarinn í leikslok. Ef ÍBV hefur betur verður að knýja fram úrslit á Íslandsmótinu í oddaleik í Origohöll Valsara á mánudagskvöld.
Fari Íslandsbikarinn á loft í leikslok í dag verður það í fyrsta sinn sem Íslandsbikarinn í karlaflokki er afhentur í Vestmannaeyjum. Slíkt hefur a.m.k. einu sinni átt sér stað í kvennaflokki.
