Rut og Óðinn best – Bruno og Rakel efnilegust – fjórir róa á ný mið

Rakel Sara Elvarsdóttir, Óðinn Þór Ríkharðsson, Rut Arnfjörð Jónsdóttir og Bruno Bernat með viðurkenningar sína á lokahófi KA. Mynd/KA

Rut Arnfjörð Jónsdóttir og Óðinn Þór Ríkharðsson voru valin bestu leikmenn kvennaliðs KA/Þórs og karlaliðs KA á lokahófi handknattleiksdeildar KA sem haldið var á Vitanum í gærkvöld. Þar var keppnistímabilið sem er að baki gert upp. Frá þessu er greint á heimasíðu KA í dag.


Bruno Bernat var valinn efnilegasti leikmaður KA. Bruno sem er 20 ára gamall markvörður og vakti verðskulda athygli fyrir framgöngu sína á leiktíðinni.


Rakel Sara Elvarsdóttir var valin efnilegasti leikmaður KA/Þórs en hún hlaut þann sama heiður í fyrra einnig. Rakel Sara sem er 19 ára gömul var markahæsti leikmaður KA/Þórs í vetur með 169 mörk þegar mörk í öllum mótum hafa verið lögð saman.


Einar Rafn Eiðsson og Kristín Aðalheiður Jóhannsdóttir voru valin bestu liðsfélagararnir en auk framgöngu sinnar á vellinum hafa þau unnið mikið starf í kringum liðin og eru ómetanleg í klefanum, segir í tilkynningu frá KA.


Þá voru fjórir leikmenn kvaddir þar sem þeir róa á ný mið í sumar. Óðinn Þór Ríkharðsson gengur til liðs við svissneska stórliðið Kadetten Schaffhausen í sumar og Arnar Freyr Ársælsson hefur ákveðið að skipta yfir til Stjörnunnar.

Ásdís og Anna yfirgefa skútuna

Ásdís Guðmundsdóttir og Anna Marý Jónsdóttir hafa ákveðið spreyta sig annarstaðar. Ekki kemur fram í tilkynningu KA hvert hugur þeirra leitar. Fyrir nokkru var greint frá því að Rakel Sara Elvarsdóttir hefur samið til tveggja ára við norska úrvalsdeildarliðið Volda.

Jón Heiðar er hættur

Andri Snær Stefánsson og Jón Heiðar Sigurðsson voru heiðraðir fyrir sitt framlag til KA en þeir hafa nú báðir lagt skóna á hilluna. Sá síðarnefndi lék á fullu gasi með KA á nýliðinni leiktíð en Andri Snær hafði rifað seglin áður en blásið var til leiks á síðasta hausti.


Sex leikmenn léku með A-landsliðum Íslands í vetur og voru þau heiðruð fyrir afrekið. Óðinn Þór Ríkharðsson fyrir KA og þær Ásdís Guðmundsdóttir, Rut Arnfjörð Jónsdóttir, Rakel Sara Elvarsdóttir, Unnur Ómarsdóttir og Aldís Ásta Heimisdóttir fyrir KA/Þór.

Martha komin með yfir 300 leiki

Martha Hermannsdóttir lék sinn 300. leik fyrir félagið á tímabilinu og var heiðruð af stjórn KA/Þórs. Þá voru þær Arna Valgerður Erlingsdóttir, Hulda Bryndís Tryggvadóttir, Anna Þyrí Halldórsdóttir, Rakel Sara Elvarsdóttir, Unnur Ómarsdóttir, Katrín Vilhjálmsdóttir, Erla Heiður Tryggvadóttir og Ásdís Guðmundsdóttir heiðraðar fyrir 100 leiki fyrir KA/Þór.


Magnús Sigurður Sigurólason og Sigurður Einar Tryggvason stóðu vaktina á ritaraborðinu að vanda og voru þökkuð góð störf á lokahófinu.

- Auglýsing -

Nýjustu fréttir

- Auglýsing -