Sandra og félagar svöruðu fyrir sig

Sandra Erlingsdóttir og samherjar hennar í EH Aalborg dvöldu ekki lengi við tap í fyrstu umferð dönsku 1. deildarinnar í handknattleik um síðustu helgi. Þær svörðuðu hressilega fyrir sig í dag á heimavelli þegar þær mættu leikmönnum Hadsten. Gestirnir sáu aldrei til sólar í Álaborg.

Sandra og félagar unnu stórsigur, 35:22, eftir að hafa verið sjö mörkum yfir að loknum fyrri hálfleik, 17:10.

Sandra skoraði fimm mörk í leiknum, þar af fjögur úr vítakasti. Þá var hún aðsópsmikil í vörninni og var m.a. einu sinni vísað af leikvelli.

Markvarslan var mikið betri hjá EH Aalborg en í Hróarskeldu um síðustu helgi. Eins og gefur að skilja skipti það miklu máli.