Elvar Örn Jónsson sækir að vörn Litáa á dögunum. Mynd/HSÍ

„Mér fannst við ljúka þessu verkefni mjög vel. Þetta var skrítinn leikur að fara verandi öruggir inn á EM og mæta botnliði riðilsins. Við vildum bara svara fyrir leikinn gegn Litáen og koma af krafti til leiks og lenda ekki í basli og það tókst. Sigurinn var sannfærandi eins og stefnt var að,“ sagði Elvar Örn Jónsson landsliðsmaður í handknattleik í samtali við handbolta.is í kvöld eftir að íslenska landsliðið vann Ísrael, 39:29, í lokaleik sínum í undankeppni EM.


„Þetta var hraður leikur og ísraelska liðið er sprækt, ekki síst byrjunarliðið. Þeir náðu kannski að opna vörn okkar á stundum full auðveldlega. Þessu verkefni er lokið og við verðum með á EM í janúar. Það skiptir öllu máli þessa stundina,“ sagði Elvar Örn sem skoraði fjögur mörk í dag og var að vanda í stóru hlutverki jafnt í vörn sem sókn íslenska landsliðsins.


Elvar Örn fær stuttan tíma til þess að kasta mæðinni eftir landsleikina þrjá á síðustu sex dögum. Framundan er leikur með Skjern í úrslitakeppninni í Danmörku á miðvikudagskvöldið gegn ríkjandi meisturum Aalborg Håndbold. „Við eigum tölfræðilega möguleika á sæti í undanúrslitum en til þess verðum við að vinna þrjá síðustu leikina,“ sagði Elvar Örn Jónsson, landsliðsmaður í handknattleik sem lék í dag sinn 46. landsleik og skoraði sitt 120. mark fyrir landsliðið.

Elvar Örn flytur sig um set í sumar frá Skjern til Melsungen í Þýskalandi.

- Auglýsing -

Nýjustu fréttir

- Auglýsing -