Sigríður Hauksdóttir, leikmaður HK og landsliðskona í handknattleik. Mynd/HK

HK vann sannfærandi og sanngjarnan sigur á Stjörnunni í Olísdeild kvenna í handknattleik í Kórnum í dag í upphafsleik 10. umferðar, 28:26. Kópavogsliðið var með yfirhöndina í leiknum frá upphafi til enda og var m.a. fjórum mörkum yfir að loknum fyrri hálfleik, 11:7.

HK hefur þar með sjö stig í sjöunda sæti deildarinnar en Stjarnan situr að minnsta kosti eitthvað áfram í fjórða sæti með 10 stig.

HK-liðið var betra í leiknum í dag frá fyrstu til síðustu mínútu. Varnarleikur liðsins í fyrri hálfleik var öflugur, 4/2, og komust leikmenn Stjörnunnar lítt áleiðis auk þess sem mistök voru alltof mörg. Selma Þór Jóhannsdóttir var einnig góð í markinu og varði um það bil annað hvert skot sem á hana kom.

Í síðari hálfleik hélt HK áfram að leika vel á báðum endum vallarins og náði um skeið sjö marka forskoti, 21:14. Stjörnuliðið náði aðeins að skrúfa upp hraðann í leik sínum en það hjálpaði ekki mikið. HK-liðið var með öll ráð í höndum sér gegn fremur lánlausu liði Stjörnunnar sem oft hefur leikið betur en raun var á að þessu sinni. Hraðinn var lítill í leik liðsins, hraðaupphlaup og síðari bylgja lítt notuð. Markvarslan engin sem var e.t.v. í takti við varnarleikinn sem var ekki góður.

Mörk HK: Elna Ólöf Guðjónsdótir 5, Sigríður Hauksdóttir 5, Díana Kristín Sigmarsdóttir 4, Krístín Guðmundsdóttir 4, Tinna Sól Björgvinsdóttir 3, Berglind Þorsteinsdóttir 3, Jóhanna Margrét Sigurðardóttir 2/2, Hafdís Shizuka Iura 2.
Varin skot: Selma Þóra Jóhannsdóttir 13/1, 35,1%.
Mörk Stjörnunnar: Eva Björk Davíðsdóttir 12/6, Sólveig Lára Kjærnested 4, Anna Karen Hansdóttir 2, Elena Elísabet Birgisdóttir 2, Karen Tinna Demian 2, Hanna Guðrún Stefánsdóttir 2, Elísabet Gunnarsdóttir 1.
Varin skot: Tinna Húnbjörg Einarsdóttir 4, 12,9%.

Öll tölfræði leiksins hjá HBStatz.

- Auglýsing -

Nýjustu fréttir

- Auglýsing -