- Auglýsing -

Sara Sif kunni vel við sig á fjölunum í Kórnum

Sara Sif Helgadóttir, markvörður Vals náði sér vel á strik gegn gömlum samherjum í gærkvöld. Mynd/Hafliði Breiðfjörð

Valur vann annan leik sinn í röð í Olísdeild kvenna í dag er liðið lagði HK, 23:14, í Kórnum í Kópavogi. Eins og úrslitin gefa e.t.v. til kynna þá var talsverður munur á liðunum að þessu sinni auk þess sem Sara Sif Helgadóttir, markvörður Vals og fyrrverandi liðsmaður HK, fór á kostum í markinu hjá Val. Hún kunni svo sannarlega við sig á fjölunum í Kórnum. Sara Sif varði 14 skot, og var með 58,3% markvörslu.


Fimm marka munur var á liðunum að loknum fyrri hálfleik, 13:8, Val í vil.
Ljóst var að HK-liðið átti ekkert svar við stórleik Söru Sifjar að þessu sinni.

Með sigrinum heldur Valsliðið örugglega í annað sæti deildarinnar á næstunni. Valur er með 20 stig eftir 15 leiki og er stigi á undan Fram sem mætir Haukum síðar í dag. Haukar eru þremur stigum á eftir Val. HK er áfram í næst neðsta sæti deildarinnar, því sjöunda, með sjö stig, og fjarlægist fremur en hitt liðin fyrir ofan. Sjötta sætið er það síðasta sem gefur keppnisrétt í úrslitum Íslandsmótsins í vor.


Thea Imani Sturludóttir átti stórleik í vörn Vals og var með átt löglegar stöðvanir. Hildur Björnsdóttir var með fimm og Lovísa Thompson fjórar auk þess sem hún stal boltanum í fjögur skipti.


Jóhanna Margrét Sigurðardóttir var með fimm lögleg stopp í vörn HK og Berglind Þorsteinsdóttir var með fjórar löglegar stöðvanir og stal boltanum tvisvar af Valsliðinu.


Mörk HK: Jóhanna Margrét Sigurðardóttir 6/3, Valgerður Ýr Þorsteinsdóttir 3, Alfa Brá Hagalín 1, Guðrún Erla Bjarnadóttir 1, Embla Steindórsdóttir 1, Margrét Guðmundsdóttir 1, Þóra María Sigurjónsdóttir 1.
Varin skot: Margrét Ýr Björnsdóttir 14/1, 37,8%.

Mörk Vals: Thea Imani Sturludóttir 4, Hildigunnur Einarsdóttir 4, Þórey Anna Ásgeirsdóttir 3/3, Lovísa Thompson 3, Mariam Eradze 2, Auður Ester Gestsdóttir 2, Morgan Marie Þorkelsdóttir 2, Brynja Katrín Benediktsdóttir 2, Hanna Karen Ólafsdóttir 1.
Varin skot: Sara Sif Helgadóttir 14, 58,3% – Saga Sif Gísladóttir 2, 33,3%.

Öll tölfræði leiksins er hjá HBStatz.

Stöðu og næstu leiki í Olísdeild kvenna er að finna hér.

- Auglýsing -
- Auglýsing -

Nýjustu fréttir

- Auglýsing -