Atli Ævar Ingólfsson að skora eitt af sjö mörkum sínum í leiknum. Mynd/Selfoss/SÁ

Selfoss lét leikmenn Þórs Akureyri ekki slá sig út af laginu þegar liðin mættust í Olísdeild karla í Hleðsluhöllinni á Selfossi í dag. Vilius Rasimas, markvörður, Selfoss fór á kostum og sá til þess að Þórsarar voru aldrei líklegir til þess að fá eitthvað út úr leiknum. Litháinn fór á kostum í markinu og varði 16 skot og var með 44% hlutfallsmarkvörslu.


Línumaðurinn Atli Ævar Ingólfsson, sem á ættir að rekja í höfuðstaðinn nyrðra fór einnig mikinn. Hann var með fullkomna nýtingu í þeim sjö skotum sem hann beindi að marki Þórs. Lokatölur, 33:24, fyrir Selfoss sem var átta mörkum yfir að loknum fyrri hálfleik, 20:12.


Selfoss er þar með komið með níu stig eins og FH, ÍBV og Afturelding í þriðja til sjötta sæti deildarinnar, stigi á eftir Val sem er í öðru sæti og þremur á eftir Haukum sem sitja sem fastast í efsta sæti.


Það var aldrei spenna í leiknum í Hleðsluhöllinni í dag. Til þess var munurinn of mikill. Meðbyrinn er með Selfoss-liðinu um þessar mundir eftir að þráðurinn var tekinn upp í Olísdeildinni í síðasta mánuði.


Ragnar Jóhannsson lék öðru sinni með Selfoss-liðinu eftir að hann flutti heim frá Þýskalandi í byrjun janúar. Hann skoraði þrjú mörk í sex skotum og var aðsópsmikill í vörninni og var m.a. með sex löglegar stöðvanir.
Þór er í næst neðsta sæti með tvö stig eftir sjö leiki og miðað við stöðuna í dag verður liðið helst í keppni við ÍR um að forðast neðsta sætið.

Vilius Rasimas og Alexander Hrafnkelsson, markverðir Selfoss, bera saman bækur sínar. Mynd/Selfoss/SÁ


Mörk Selfoss: Atli Ævar Ingólfsson 7, Einar Sverrirsson 5, Sveinn Aron Sveinsson 4, Hergeir Grímsson 4, Ragnar Jóhannsson 3, Guðmundur Hólmar Helgason 3, Magnús Öder Einarsson 2, Hannes Höskuldsson 2, Tryggvi Þórisson 2, Nökkvi Dan Elliðason 1.
Varin skot: Vilius Rasimas 16, 44,4%, Alexander Hrafnkelsson 2, 40%.


Mörk Þórs: Arnþór Gylfi Finnsson 5, Ihor Kopyshynskyi 5/1, Hafþór Ingi Halldórsson 4, Arnór Þorri Þorsteinsson 3, Sigurður Már Stefánsson 2, Heimir Pálsson 1, Sigurður Kristófer Skjaldarsson 1, Garðar Már Jónsson 1, Gísli Jörgen Gíslason 1, Karolis Stropus 1.
Varin skot: Arnar Þór Fylkisson 13, 28,3%.

- Auglýsing -

Nýjustu fréttir

- Auglýsing -