„Eftir tvö góð ár saman þá tekur nýr maður við liðinu og um leið gefst tækifæri til þess fyrir liðið að byrja upp á nýtt,“ sagði Aron Kristjánsson við handbolta.is í gærkvöld eftir að hann stýrði karlaliði Hauka í síðasta sinn en hann lætur af störfum sem þjálfari liðsins eftir tvö ár að þessu sinni. Snýr hann sér að öðrum störfum hjá Haukum samhliða þjálfun annarstaðar og þá væntanlega utan landssteinanna sem tengist stöku verkefnum en ekki daglegri vinnu.
„Margt er hægt að læra af því tímabili sem nú var að ljúka hjá okkur. Framundan eru dagar til að sleikja sárin áður en leikmenn hefja æfingar og undirbúning af krafti fyrir næsta keppnistímabil undir stjórn nýs þjálfara með það að markmiði að vinna titla á næsta keppnistímabili,“ sagði Aron ennfremur.
Skýrist vonandi á næstu dögum
Spurður hvað taki við hjá Aroni auk starfa á bak við tjöldin hjá Haukum sagði hann það vera að taka á sig mynd. „Það hefur tekið sinn tíma, ekki síst vegna þess að ég hef viljað stíga næstu skref á mínum forsendum. Hvað verður kemur í ljós á næstunni. Eitt og annað hefur verið í vinnslu og er orðið nokkuð klárt,“ sagði Aron sposkur á svip í samtali við handbolta.is í íþróttamiðstöðinni í Vestmannaeyjum í gærkvöld.
Þjálfarar ráðnir um helgina?
Heimildir handbolta.is herma að tilkynnt verði á allra næstu dögum hver taki við af Aroni sem þjálfari karlaliðs Hauka. Um leið verði upplýst hver taki við þjálfun kvennaliðs Hauka eftir að Gunnar Gunnarsson var leystur frá störfum um síðustu helgi.
Fer Rúnar á Ásvelli?
Rúnar Sigtryggsson fyrrverandi leikmaður Hauka og þjálfari Stjörnunnar, Akureyri handboltafélags og þýsku liðanna Balingen og EHV Aue hefur verið sterklega orðaður við þjálfarastarfið hjá karlaliðinu.
Kvennaliðið er ráðgáta
Hver tekur við þjálfun kvennaliðsins er meiri ráðgáta þótt ýmsum áhugaverðum nöfnum hafi verið varpað fram í vangaveltum manna á milli síðustu daga.
Þorgeir Haraldsson formaður handknattleiksdeildar Hauka hélt spilunum afar þétt að sér í samtali við handbolta.is. Sagði hann framhaldið koma í ljós fljótlega.
