Sigfús Páll Sigfússon hefur tekið við þjálfun kvennaliðs Víkings í Grill 66-deildinni. Mynd/Víkingur

Sigfús Páll Sigfússon hefur tekið við þjálfun kvennaliðs Víkings sem leikur í Grill 66-deildinni. Sigfús Páll er fyrrverandi leikmaður Vals, Fram, Fjölnis og Wakunaga í Japan en eftir að handboltaskórnir fóru upp á hillu hefur hann verið við þjálfun.

„Það er virkilega spennandi tækifæri að fá að taka þátt í uppbyggingunni sem er að eiga sér stað hér í Víkinni. Ég var nú þegar kominn aðeins inn í Víking gegnum barnastarfið en eldri dóttir mín æfir með Víkingi. Það er brátt að koma inn á þessum tímum en það gerir verkefnið þeim mun áhugaverðara. Þetta verður keyrsla en liðið hefur allt til að bera til að ná góðum árangri,“ er haft eftir Sigfúsi Páli í tilkynningur sem handknattleiksdeild Víkings sendi frá sér í dag.

Fyrsti leikur Víkings undir stjórn Sigfúsar Páls verður gegn ÍR í Austurbergi í kvöld.

Í fyrrgreindri tilkynningu frá Víkingi segir ennfremur:

Orkan sem kraumar undir niðri í Víkinni er farin að vekja athygli og smitast út í allt handboltastarfið. Meistaraflokkur karla situr í efsta sæti Grill 66 deildarinnar og meistaraflokkur kvenna hefur verið að sækja í sig veðrið.

Mikill metnaður hefur verið lagður í umgjörð kringum leikmenn hvað varðar aðstöðu og þjálfara svo eitthvað sé nefnt. Nýbúið er að gera upp lyftingaaðstöðu og vinna við nýjan klefa meistaraflokka kvenna er á lokametrunum. „Það dugir ekkert minna en almennilega aðstaða fyrir leikmenn ef á að ná árangri og það þýðir almennileg styrktaraðstaða, heitur og kaldur pottur svo eitthvað sé nefnt,“ segir Hallur Magnússon stjórnarmaður handknattleiksdeildar Víkings.

„Við erum að styrkja þjálfarateymið, umgjörðina, bæta aðstöðuna og senda út leiki á Víkingur TV til að styðja við þá stemningu sem við finnum svo sterkt fyrir. Að fá Sigfús Pál til liðs við okkur er leiksigur en við höfum mikla trú á honum í verkefnið. Það eru spennandi tímar framundan en ung og efnileg meistaraflokkslið Víkings eiga eftir að láta til sín taka á næstu misseri,“ segir Helga Birna Brynjólfsdóttir formaður stjórnar.

- Auglýsing -

Nýjustu fréttir

- Auglýsing -