Eftir nærri mánaðarhlé þá fóru Sandra Erlingsdóttir og samherjar í EH Aalborg út á leikvöllinn í dag og unnu góðan sigur, 35:26, á Rødovre í dönsku B-deildinni í handknattleik en leikið var í Rødovre.
Sandra var að vanda í stóru hlutverki hjá Álaborgarliðinu. Hún skoraði þrjú mörk og stjórnaði leik liðsins af röggsemi. EHF Aalborg var með yfirhöndina í leiknum frá upphafi til enda og hafði m.a. fimm marka forskot að loknum fyrri hálfleik, 17:12.
Fimm umferðir eru eftir í deildinni. Ringkøbing er efst með 29 stig eftir 17 leiki. Sandra og félagar í EH Aalborg eru í öðru sæti með 26 stig. Ringsted situr í þriðja sæti með 25 stig og SønderjyskE og Berringbro eru þar á eftir með 24 stig hvort lið. DHG er í sjötta sæti með 22 stig. Það stefnir í æsispennandi endasprett í deildinni. Efsta liðið fer rakleitt upp í úrvalsdeild en þau sem hafna í öðru og þriðja sæti fara í umspil um þátttökurétt í úrvalsdeild á næstu leiktíð.
