Andrea Jacobsen, landsliðskona í handknattleik og stöllur hennar í Kristianstad fór vel af stað í 1. umferð sænsku bikarkeppninnar í handknattleik í dag en 32-liða úrslit keppninnar fara fram í átta fjögurra liða riðlum. Kristianstad vann stórsigur á VästeråsIrsta HK, 32:18, á útivelli.
Kristianstad hafði mikla yfirburði í síðari hálfleik en aðeins var tveggja marka munur að loknum fyrri hálfleik, 14:12. Ljóst er að leikmenn VästeråsIrsta komust hvorki lönd né strönd í síðari hálfleik.
Andrea skoraði tvö mörk í leiknum. Kristianstad leikur á ný á morgun gegn Eskilstuna Guif en þriðji og síðasti leikur liðsins í riðlakeppninni verður um næstu helgi á móti Skövde.
Tvö lið komast áfram úr hverjum riðli í 16-liða úrslitum en nánar var greint frá fyrirkomulaginu í grein á handbolta.is á dögunum. Þá grein má nálgast hér.
