Sigursteinn innsiglar þriggja ára samning

Sigursteinn Arndal, þjálfari FH. Mynd/Egill Bjarni Friðjónsson

Sigursteinn Arndal hefur skrifað undir nýjan þriggja ára samning við handknattleiksdeild FH og stefnir þar með á að stýra FH-liðinu út leiktíðina vorið 2025. Hann er að ljúka sínu þriðja keppnistímabili með FH-liðið sem mætir Selfoss í fyrstu umferð átta liða úrslita Olísdeildar í Kaplakrika í kl. 19.30 í kvöld.


„Það er mjög ánægjulegt að vera búin að tryggja okkur starfskrafta Steina til næstu ára. Það hafa verið mjög krefjandi aðstæður síðastliðin ár og Steini staðið sig gríðarlega vel sem skipstjóri FH skútunnar. Það eru spennandi tímar framundan og FH ætlar sér að vera áfram í fremstu röð innan vallar sem utan, hér eftir sem hingað til,” er haft eftir Ásgeiri Jónssyni formanni handknattleiksdeildar FH í tilkynningu á vefsíðu félagsins.


„Ég er fullur tilhlökkunar að halda áfram á því ferðalagi sem við höfum verið á síðustu ár. Leikmannahópurinn er góður, metnaðarfullur og það er alltaf stefnt að sigri í öllu því sem liðið tekur sér fyrir hendur. Umgjörðin í kringum liðið góð þar sem leikmenn, þjálfarateymi, stjórnarmenn og sjálfboðaliðar vinna markvist að því að FH sé að berjast á toppnum í íslenskum handbolta eins og FH á að vera gera,” er m.a. haft eftir Sigursteini í fyrrgreindri tilkynningu.

- Auglýsing -

Nýjustu fréttir

- Auglýsing -