„Sóknarleikurinn var svolítið klossaður hjá okkur í fyrri hálfleik á miðvikudagskvöldið. Við vorum of mikið að reyna að þvinga eitthvað fram í stað þess að láta leikinn aðeins koma til okkar,“ sagði Janus Daði Smárason, leikstjórnandi íslenska landsliðsins í handknattleik í samtali við handbolta.is.
Janus Daði verður í eldlínunni með íslenska landsliðinu í dag þegar það mætir landsliði Portúgal í annað sinn á fimm dögum í undankeppni EM2022, degi áður en haldið verður á heimsmeistaramótið í Egyptalandi þar sem portúgalska liðið verður einnig fyrsti andstæðingur íslenska landsliðsins.
„Við sjáum mikla möguleika fyrir okkur gegn portúgölsku vörninni. Við verðum klárir í slaginn og mætum þeim af fullum krafti frá upphafi. Portúgölsku leikmennirnir reyndu að drepa niður hraðann í sókninni okkar. Við mætum því í leiknum,“ sagði Janus Daði og bætti við að það tæki alltaf sinn tíma að spila sig saman. Síðustu daga hafi landsliðshópurinn náð nokkrum æfingum og stillt saman strengina.
Leikur Íslands og Portúgals hefst klukkan 16 í Schenker-höllinni á Ásvöllum í dag. Áhorfendur fá ekki aðgang en hægt verður að fylgjast með beinni útsendingu hjá RÚV.
