Sjö á sex er aðal svissneska landsliðsins

Arnór Þór Gunnarsson hefur leikið sinn síðasta landsleik ef að líkum lætur. Mynd/EPA

„Framundan hjá okkur eru leikir við þrjú hörkulið sem leika hefðbundinn evrópskan handknattleik með sínum áherslum. Nokkuð sem við þekkjum vel,“ sagð Arnór Þór Gunnarsson, fyrirliði íslenska landsliðsins í samtali við handbolta.is í Kaíró í gær. Íslenska landsliðið hefur keppni í milliriðlum í dag og mætir landsliði Sviss. Flautað verður til leiks klukkan 14.30.


„Aðal svissneska liðsins er að leika mikið sjö á sex í sóknarleiknum með hinn frábæra Andy Schmid í aðalhlutverki. Hann hefur verið einn besti handknattleiksmaður heims undanfarin 12 ár og ein af skrautfjöðrum þýsku búndesligunnar,“ sagði Arnór Þór en fyrrgreindur Schmid er liðsfélagi Alexanders Peterssonar og Ýmis Arnar Gíslasonar hjá Rhein-Neckar Löwen.

Undirbúningurinn var snarpur hjá íslenska landsliðinu í gær þar sem hluti dagsins fór í að ferðast á milli hótela. Talsverð fjarlægð er á milli borgarhluta hér í Kaíró og sumstaðar eru samgöngur tafsamar vegna mikillar umferðar í þessari 20 milljóna manna borg.


„Við verðum að nýta tímann mjög vel til að fara yfir svissneska liðið. Það er mjög frábært lið sem getur leikið hörkuskemmtilegan handknattleik, jafnt sjö á sex og sex á sex,“ sagði Arnór Þór Gunnarsson, fyrirliði íslenska landsliðsins í gær.

- Auglýsing -

Nýjustu fréttir

- Auglýsing -