Skammt stórra högga á milli hjá Gunnari

Gunnar Gunnarsson t.v. ásamt Arnkeli Bergmann Arnkelssyni varaformanni handknattleiksdeildar Gróttu. Mynd/Eyjólfur Garðarsson

Handknattleiksþjálfarinn Gunnar Gunnarsson var ekki lengi að fá nýtt starf eftir að Haukar leystu hann undan samningi í gær. Fyrir stundu var tilkynnt að Gunnar taki við þjálfun kvennaliðs Gróttu af Kára Garðarssyni. Grótta hefur samið við Gunnar til þriggja ára.


Gunnar er þrautreyndur þjálfari og landsliðsmaður þar á undan. Hann er alls ekki ókunnugur staðháttum á Seltjarnarnesi en hann þjálfaði kvennalið Gróttu árin 1998-2000 og aftur 2001-2002. Árið 2000 stýrði hann liðinu alla leið í bikarúrslit og í úrslitaeinvígið um Íslandsmeistaratitilinn. Tveimur árum síðar fór liðið aftur í bikarúrslit undir stjórn Gunnars.


Undanfarin tvö tímabil hefur Gunnar þjálfað kvennalið Hauka og náð afar góðum árangri með liðið. Áður þjálfaði hann karlalið Víkings, Selfoss og Fjölnis en hann hefur einnig þjálfað Elverum og Drammen í Noregi.


„Það ríkir mikil ánægja með að Gunnar sé kominn á Nesið enda frábær þjálfari með mikla reynslu. Kára Garðarssyni sem hefur þjálfað liðið undanfarin tvö tímabilin er þakkað mikið og gott starf,“ segir í tilkynningu handknattleiksdeildar Gróttu sem barst fyrir stundu.

- Auglýsing -

Nýjustu fréttir

- Auglýsing -