- Auglýsing -

Slæmur skellur eftir margra vikna sóttkví

Hannes Jón Jónsson, fyrir miðri mynd, þjálfari Birietigheim ræðir við sína menn. Mynd/Bietigheim

Eftir langa mæðu þá fékk þýska 2. deildarliðið Bietigheim, sem Hannes Jón Jónsson þjálfari og Aron Rafn Eðvarðsson, markvörður, leikur með, grænt ljós til að leika á ný deildarleik í gærkvöld. Bietigheim fékk þá liðsmenn Grosswallstadt í heimsókn. Eftir jafnan fyrri hálfleik þá datt allur botn úr sóknarleik Bietigheim í síðari hálfleik. Afleiðingin var sú að liðið tapaði með 11 marka mun, 28:17.


Aron Rafn stóð í marki Bietigheim í um 46 mínútur og varði sjö skot, sem gerir um 25% hlutfallsmarkvörslu.

Leikmenn Bietigheim virtist skorta kraft þegar kom fram í síðari hálfleikinn. Þegar leikurinn var hálfnaður stóðu leikar, 10:9, fyrir Grosswallstadt.

Þjálfarinn var á skýrslu

Fjóra leikmenn vantaði í hópinn hjá Bietigheim í gærkvöld. Einn var fjarri góðu gamni vegna meiðsla en þrír hafa ekki jafnað sig af veikindum sem fylgdu kórónuveirunni. Hannes Jón þjálfari var skráður leikmaður á skýrslu í leiknum. Ekki kom til þess að hann léki með.

Bietigheim hefur unnið einn leik en tapað þremur fram til þessa á slitróttu keppnistímabili.

Þetta var einungis fjórði leikur Bietigheim á keppnistímabilinu. Liðið lék 10. og 17. október og síðan ekki aftur fyrr en 14. nóvember. Kórónuveiran hefur gert leikmönnum og þjálfara gramt í geði. Liðið hefur meira og minna verið í sóttkví síðan um 20. október. Gangi hinsvegar allt að óskum næstu daga er framundan mikil leikjatörn fram til áramóta. Stendur til að leika annan og þriðja hvern dag út árið.

- Auglýsing -
- Auglýsing -

Nýjustu fréttir

- Auglýsing -