Skoraði sjö mörk og skapaði fimm marktækifæri

Díana Dögg Magnúsdóttir hefur gert það gott hjá BSV Sachsen Zwickau þótt liðinu hafi ekki gengið sem skildi. Mynd/BSV Sachsen Zwickau

Díana Dögg Magnúsdóttir skoraði sjö mörk þegar lið hennar, BSV Sachsen Zwickau tapaði á útivelli fyrir Thüringer með níu marka mun, 37:28, í þýsku 1. deildinni í handknattleik í dag. Auk þess átti Díana Dögg tvær stoðsendingar, var með fimm sköpuð færi, átti fimm löglegar stöðvanir í vörni, vann einn andstæðing af leikvelli og varð einu sinni sjálf að fara af velli í tvær mínútur fyrir leikbrot.


BSV Sachsen Zwickau er ennþá í næst neðsta sæti deildarinnar með níu stig þegar liðið á fjóra leiki eftir. HL Buchholz 08-Rosengarten í næsta sæti fyrir ofan, einu stigi á undan en á tveimur leikjum eftir ólokið.


„Það var engin markvarsla hjá okkur í fyrri hálfleik auk þess sem leikur var ekki góður,“ sagði Díana Dögg við handbolta.is í kvöld. Thüringer var níu marka forskot í hálfleik, 20:11.


„Í seinni hálfleik spiluðum bara vel í seinni og fengum markvörslu en ótímabær skot eða illa valin á kafla í hálfleiknum varð til þess að munurinn jókst á ný til viðbótar við að sú sem byrjaði í markinu kom aftur í markið og hélt áfram að verja ekki neitt,“ sagði Díana Dögg ennfremur. Skortur á markvörslu hefur verið hausverkur Zwickauliðsins á keppnistímabilinu.


Þrátt fyrir að á móti blási þá er engin uppgjöf í leikmönnum BSV Sachsen Zwickau sem ætla að berjast fyrir sæti í deildinni með nokkur möguleiki er á. Aðeins eitt lið fellur beint í aðra deild en liðið sem hafnar í næst neðsta sæti 1. deildar tekur þátt í umspili við liðið sem hafnar í öðru sæti 2. deildar.


Framundan eru tveir leikir við Sport-Union Neckarsulm. Sá fyrri verður á Neckarsulm í suðurhluta Þýskalands á miðvikudaginn en sá síðari í Zwickau á laugardaginn eftir viku. Ástæðan fyrir að leikið er með svo stuttu millibili við sama liðið er sú að annarri viðureigninni var frestað í vetur þegar kórónuveiran herjaði á herbúðir BSV Sachsen Zwickau.


Neckarsulm er í sjöunda sæti af 14 liðum deildarinnar.

- Auglýsing -

Nýjustu fréttir

- Auglýsing -