Ólafur Andrés Guðmundsson. Mynd/EPA

„Ég slapp við það versta. Aðrir tóku höggin á sig,“ sagði Ólafur Andrés Guðmundsson, landsliðsmaður í handknattleik, í samtali við handbolta.is í gær, daginn eftir sigurleikinn við Marokkó á heimsmeistaramótinu en í leiknum, sem Ísland vann 31:23, var talsvert um ljót leikbrot af hálfu leikmanna Marokkó og fengu þrír þeirra rautt spjald. Sem betur fer virðast íslensku leikmennirnir sem versta útreið fengu ekki hafa beðið skaða af.


Ólafur segist nú horfa fram á veginn enda er framundan fyrsti leikur í millriðlakeppni HM. Fyrsta viðureignin verður í dag þegar íslenska landsliðið mætir landsliðið Sviss klukkan 14.30 í Hassan Moustafa íþróttahöllinni.
„Maður var aðeins farinn að horfa inn í milliriðlana áður en að Marokkóleiknum kom. Hvað maður gæti tekið með sér af stigum og hugsanlega hverjum við mætum. Eins og fyrri daginn þá verður undirbúningurinn stuttur og snarpur til viðbótar við að leikið verður fyrr að deginum að undanförnu þegar leikjunum hefur lokið um klukkan 23 að staðartíma en tveggja tíma munur er milli Íslands og Egyptalands.

Ég tek því fagnandi að leika fyrr að deginum. Mér finnst ekki gott að leika eins seint og við höfum verið að gera að undanförnu. Aðallega kemur þetta niður á manni daginn eftir því maður hefur ekki farið að sofa fyrr en seint og um síðir sem kemur niður á manni deginum eftir,“ sagði Ólafur.

Ólafur er spenntur fyrir viðureigninni við Sviss. „Svissneska liðið leikur mjög mikið sjö á sex með Andy Schmid í hlutverki leikstjórnanda. Hann er sá besti í heimi að velja í yfirtölu. Schmid stýrir leiknum af miklum krafti.
Framundan er hefðbundnari handknattleikur í næstu leikjum á móti ekki framliggjandi varnarleik til viðbótar við að sóknarleikur væntanlegra andstæðinga, Sviss, Frakklands og Noregs er skipulagðari. Ég geri mér ekki alveg grein fyrir hvort það er gott eða vont fyrir okkur en það verður aðeins auðveldara að leikgreina komandi andstæðinga en tvo þá síðustu,“ sagði Ólafur Andrés Guðmundsson, landsliðsmaður í samtali við handbolta.is í Kaíró í gær.

- Auglýsing -

Nýjustu fréttir

- Auglýsing -