Sleppur við bann en hefði mátt viðhafa varfærnislegra orðalag

Björgvin Páll Gústavsson, markvörður Vals og íslenska landsliðsins. Mynd/Hafliði Breiðfjörð

Björgvin Páll Gústavsson, markvörður Vals, fer ekki í leikbann vegna ummæla sem hann lét falla í samtali við mbl.is eftir viðureign Vals og Fram í átta liða úrslitum Olísdeildar karla í handknattleik í fyrrakvöld. Framkvæmdastjóri HSÍ fyrir hönd stjórnar hafði vísað hluta af ummælum hans til aganefndar til umfjöllunnar.


Aganefnd segir í úrskurði sínum í dag „að leikmaðurinn hefði í viðtalinu mátt viðhafa varfærnislegra orðalag,“ en bætir við:


„Innan tjáningarfrelsis leikmannsins rúmast, að mati nefndarinnar, réttur hans til að segja, innan skynsamlegra marka, skoðun sína á frammistöðu dómara, leikmanna og skipulagi HSÍ. Með vísan til alls framangreinds er niðurstaða nefndarinnar að ummælin feli ekki í sér ósæmilega framkomu sem skaðað getur ímynd handknattleiksíþróttarinnar.


Að mati nefndarinnar er ekki tilefni til að láta aðila sæta viðurlögum í máli þessu en áréttar þó mikilvægi þess að leikmenn líkt og þjálfarar liða sýni í orðum og í verki þá almennu háttvísi og framkomu sem samboðin er handknattleiksíþróttinni.“


Úrskurð aganefnda í heild má lesa hér.


Stefán Rafn Sigurmannsson fékk útilokun með skýrslu í viðureign Hauka og KA í gærkvöld. Hann fer ekki í leikbann en aganefnd minnir á stighækkandi áhrifum útlokana vegna slíkra brota.

- Auglýsing -

Nýjustu fréttir

- Auglýsing -