Smit í herbúðum Lemgo

Þýska handknattleiksliðið Lemgo, sem Bjarki Már Elísson leikur með, greinir frá í tilkynningu að við venjubundið eftirlit með leikmönnum og starfsmönnum félagsins á föstudaginn hafi einn leikmaður liðsins reynst jákvæður og þar af leiðandi smitaður af kórónuveirunni.

Af þessum sökum hefur verið gripið til nauðsynlegra ráðstafana. Æfingar hafa tímabundið verið felldar niður. Allir þeir sem reyndust neikvæðir við skimun á föstudaginn fara aftur í skimun í dag og síðan með reglubundnu millibili næstu daga. Reyndar hefur verið reglubundið eftirlit með hópnum síðustu vikur.

Umræddur leikmaður, sem reyndist smitaður er í einangrun, mun hafa það gott eftir atvikum.