Smit og sóttkví tveimur dögum fyrir fyrsta EM-leik

Leikmaður rúmenska landsliðsins í handknattleik greindist jákvæður við skimun fyrir kórónuveiru á landamærum við komu landsliðsins til Danmerkur í gærkvöld. Handknattleikssamband Evrópu, EHF, greinir frá þessu í tilkynningu.


Danskir fjölmiðlar greina frá að um sé að ræða hægri hornakonuna Laura Moisa (áður Chiper). Hún er komin í einangrun á öðru hóteli en leikmenn liðsins dvelja á. Moisa er framúrskarandi leikmaður og er samningsbundin stórliðinu CSM Bucaresti.

Aðrir í rúmenska hópnum reyndust vera neikvæðir. Engu að síður fara allir á ný í skimun í dag og aftur á morgun. Meðan dvelur allur hópurinn í sóttkví á hóteli sínu á Jótlandi og fær t.d. ekki að æfa í keppnishöllinni fyrr en í fyrsta lagi annað kvöld.

Fyrsti leikur Rúmena á EM verður á fimmtudaginn gegn Þjóðverjum. Sóttkví er ekki góður upptaktur fyrir mótið.


Því miður þá koma þessi tíðindi ekki í opna skjöldu. Á sunnudaginn greindist Crina Pintea, línukonan sterka í rúmenska landsliðinu, með veiruna við skimun í hópnum fyrir brottför til Danmerkur. Auk þess hefur veiran leikið mjög lausum hala í Rúmeníu upp á síðkastið.

- Auglýsing -

Nýjustu fréttir

- Auglýsing -