Smitaðist fyrir mánuði

Sveinbjörn Pétursson, markvörður. Mynd/EHV/Aue

Handknattleiksmarkvörðurinn Sveinbjörn Pétursson, sem leikur með þýska liðinu EHV Aue, var einn leikmanna liðsins sem fékk kórónuveiruna fyrir meira en mánuði. Þetta staðfestir hann við vefmiðilinn akureyri.net í dag. Sveinbjörn hefur jafnað sig og segist vera orðinn eldhress.


Aftur kom upp smit innan liðs EHV Aue í liðinni viku og af þeim sökum eru leikmenn nú öðru sinni í sóttkví. Leikjum liðsins hefur verið frestað og ljóst að meira en vika mun líða áður en þráðurinn verður tekinn upp á ný.


Aue lék þrisvar sinnum áður en smitið kom upp fyrir um mánuði. Eftir að leikmenn komust aftur á ról náði liðið einum leik. Af leikjunum fjórum hefur Aue unnið þrjá en tapað einum.


Leikjadagskrá 2. deildar er úr skorðum gengin en nítján lið eru í deildinni. Þau hafa leikið frá þremur og upp í níu leiki hvert, og ljóst að það mun verða nokkurt púsluspil að koma keppninni á ról aftur.


Sveinbjörn gekk til liðs við EHV Aue í sumar eftir að hafa leikið með Stjörnunni um skeið. Hann þekkir vel til í herbúðum Aue-liðsins enda lék hann með liðinu frá 2012-2016. Annar Íslendingur leikur með EHV Aue, Arnar Birkir Hálfdánsson.

Frétta- og mannlífsvefurinn akureyri.net.

- Auglýsing -

Nýjustu fréttir

- Auglýsing -