Sebastian Alexandersson, þjálfari Fram, leggur á ráðin með sínum mönnum. Mynd/Egill Bjarni Friðjónsson.

Sebastian Alexandersson, þjálfari karlaliðs Fram í handknattleik, var ánægður með heilsteyptan leik sinn manna gegn Þór Akureyri í Olísdeildinni í gærkvöld, 31:19. Þeir hafi haldið áfram af fullum krafti allt til loka þótt forskotið hafi verið mikið og ljóst töluvert fyrir leikslok hvort liðið bæri sigur úr býtum.


„Ég er mest ánægður með að eftir góða byrjun þá héldum við áfram allt til leiksloka. Okkur fannst við skulda okkur sjálfum eitt og annað og litum því í eigin barm eftir síðustu þrjá leiki. Það er ekkert launungarmál að okkur þótti við verðskulda meira en ekkert stig úr leikjunum þremur áður en kom að leiknum við Þór í kvöld,“ sagði Sebastian og átti við leikina gegn FH, ÍBV og Val. Tveir þeirra voru á heimavelli og viðureignin við ÍBV tapaðist á síðustu sekúndunum.

„Að þessu sinni sýndu menn vilja og löngun til að koma í veg fyrir þriðja tapleikinn á heimavelli í röð. Það kom ekki til greina að tapa. Við ákváðum að líta ekki á markatöfluna fyrr en leiknum væri lokið,“ sagði Sebastian í samtali við handbolta.is.


„Leikurinn snerist um að finna ræturnar okkar á nýjan leik. Varnarleikurinn var góður frá fyrstu mínútu og um leið fylgdi markvarslan með.

Sóknarleikurinn var jafn og góður. Segja að má að þetta hafi verið fyrsti „complet“ leikurinn okkur á keppnistímabilinu.“

Getum gefið skít í væntingar

Fram mætir Haukum í næstu umferð á mánudaginn í Framhúsinu. „Það verður spennandi að máta sig við lið sem nánast er ekki hægt að vinna. Við getum að minnsta gefið skít í allar væntingar og sleppt fram af okkur beislinu. Ef við gerum það með sama viðhorfi og í kvöld þá gerist kannski eitthvað. Sjáum til,“ sagði Sebastian Alexandersson, þjálfari Fram, í samtali við handbolta.is í gærkvöld.

- Auglýsing -

Nýjustu fréttir

- Auglýsing -