Þór Akureyri vann sín fyrstu stig í Olísdeild karla á þessari leiktíð þegar liðið vann ÍR, 26:21, í Austurbergi í kvöld í 3. umferð deildarinnar. Þór var tveimur mörkum yfir í hálfleik, 13:11. ÍR er þar með áfram stigalaust á botni deildarinnar en landið er tekið að rísa hjá Þórsurum.
Eftir að hafa verið tveimur mörkum yfir í hálfleik þá tóku Þórsarar öll völd á vellinum í síðari hálfleik og náðu öruggri forystu sem liðið hélt til leiksloka. Varnarleikur Þórsara var góður eins og í fyrri leikjum og með honum lagði liðið fyrst og síðast grunninn að þessum góða sigri.
Ihor Kopyshynskyi var markahæstur hjá Þór. Hann átti reyndar stórleik og skoraði 10 mörk í 12 skotum. Valþór Atli Guðrúnarson var næstur með fimm mörk.
Hrannar Ingi Jóhannesson var markhæstur í slöku liði ÍR með átta mörk. Ólafur Haukur Matthíasson og Andri Heimir Friðriksson skoruðu þrjú mörk hvor.