- Auglýsing -

Sóttu tvö stig suður í Garðabæ

Rut Arnfjörð Jónsdóttir skoraði níu mörk fyrir KA/Þór gegn Stjörnunni í dag. Mynd/Egill Bjarni Friðjónsson

Íslands- og bikarmeistarar KA/Þórs sóttu tvö stig með kærkomnum sigri á Stjörnunni í TM-höllinni í Garðabæ í dag í Olísdeild kvenna í handknattleik, 27:25. Staðan var jöfn, 14:14, eftir fyrri hálfleik en meistararnir voru öflugri þegar á leikinn leið. Þetta var fyrsta tap Stjörnunnar undir stjórn Hrannars Guðmundssonar en hann tók við þjálfun eftir miðjan síðasta mánuð.


KA/Þórsliðið er til alls líklegt í þriðja sæti deildarinnar með 17 stig eftir 13 leiki og er þremur stigum og tveimur leikjum á eftir Val sem situr í öðru sæti. Meistararnir eru líklegir til þess að bíta frá sér á síðasta þriðjungi deildarkeppninnar en svo virðist sem þeir séu að ná vopnum sínum á nýjan leik.


Rut Arnfjörð Jónsdóttir lék stórt hlutverki í liði KA/Þórs eins og stundum áður. Hún skoraði níu mörk í 12 skotum og skapaði auk þess átta marktækifæri. Aldís Ásta Heimisdóttir skapaði sex færi og skoraði þrjú mörk. Hún var einnig allt í öllu í vörninni með sex lögleg stopp, eitt varið skot og einn stolinn bolta.


Elísabet Gunnarsdóttir skoraði átta mörk fyrir Stjörnuna og Helena Rut Örvarsdóttir sex auk þess að skapa fjögur marktækifæri. Einnig var hún áköf við varnarleikinn og var með sjö lögleg stopp, eitt varið skot og einn stolinn bolta. Eva Björk Davíðsdóttir stóð Helenu lítt að baki og náði sex stoppum í vörninni og einu sinni stal hún boltanum auk þess að skapa fimm marktækifæri í sókninni.


Mörk Stjörnunnar: Elísabet Gunnarsdóttir 8, Helena Rut Örvarsdóttir 6, Eva Björk Davíðsdóttir 5, Hanna Guðrún Stefánsdóttir 2, Britney Cots 2, Anna Karen Hansdóttir 1, Katla María Magnúsdóttir 1.
Varin skot: Tinna Húnbjörg Einarsdóttir 13/2, 33,3% – Darija Zecevic 0.

Mörk KA/Þórs: Rut Arnfjörð Jónsdóttir 9/3, Martha Hermannsdóttir 6/5, Rakel Sara Elvarsdóttir 4, Aldís Ásta Heimisdóttir 3, Unnur Ómarsdóttir 2, Hulda Bryndís Tryggvadóttir 2, Ásdís Guðmundsdóttir 1.
Varin skot: Sunna Guðrún Pétursdóttir 6, 35,3% – Matea Lonac 2, 12,5%.

Alla tölfræði leiksins er að finna hjá HBStatz.


Stöðu og næstu leiki í Olísdeild kvenna er að finna hér.

- Auglýsing -
- Auglýsing -

Nýjustu fréttir

- Auglýsing -