Christian Berge, þjálfari norska karlalandsliðsins í handknattleik, staðfestir í samtali við TV2 í heimalandi sínu að hann hafi rætt við forráðamenn þýska handknattleiksliðsins Rhein-Neckar Löwen um að taka við þjálfun liðsins í sumar.
Forráðamenn Rhein-Neckar Löwen eru um þessar mundir að leita að eftirmanni Martin Schwalb sem tilkynnti á dögunum að hann gæti ekki lengur sinnt starfinu eftir að núverandi keppnistímabili lýkur í byrjun sumars.
Berge segir að formlegar viðræður milli sín og forráðamanna Rhein-Neckar Löwen ekki hafa átt sér stað. Hann útiloki hinsvegar ekki neitt og alveg eins geti svo farið að hann taki við þjálfun liðsins eins og ekki. Berge þykir ánægjulegt að stórlið í Þýskalandi sýni sér áhuga.
Berge hefur stýrt norska landsliðinu í sjö ár með mjög góðum árangri þótt ekki hafi tekist að ná eins langt á HM í Egyptalandi og vonir stóðu til. Norska landsliðið tapaði fyrir Evrópumeisturum Spánverja í átta liða úrslitum.
Undir stjórn Berge hefur norska landsliðið unnið silfurverðlaun á tvennum heimsmeistaramótum auk bronsverðlauna á EM fyrir ári. Berge þekkir ágætlega til í Þýskalandi. Hann lék með Flensburg frá 1999 til 2006.
