Færeyski handknattleikmaðurinn Áki Egilsnes og leikmaður KA staðfestir í samtali við FM1 í Færeyjum að hann gangi til liðs við þýska 2. deildarliðið EHV Aue í sumar. Eins og handbolti.is greindi frá í gær samkvæmt heimildum þá hafa staðið yfir viðræður á milli Egilsnes og EHV Aue upp á síðkastið og verulega líkur á að saman myndi ganga í þeim viðræðum.
Svo virðist sem samningar séu í höfn en heimildir handbolta.is herma að aðeins eigi eftir að ganga formlega frá samningnum með undirskrift.
Egilsnes segir í fyrrgreindu samtali við FM1 vera stoltur og glaður með að hafa náð samningi við félag í næst efstu deild þýska handknattleiksins og væntir þess að vera sín í Þýskalandi geri sig að enn betri handknattleiksmanni.
Egilsnes er að ljúka sínu fjórða keppnistímabili með KA. Fyrir dyrum stendur úrslitakeppni áður en kemur að flutningi frá Akureyri til EHV Aue þar sem Egilsnes verður m.a. samherji Arnars Birkis Hálfdánssonar og Sveinbjörns Péturssonar.
