- Auglýsing -
- Sumarið er tími yngri landsliðanna í handknattleik. Í mörg horn hefur verið að líta síðan í byrjun sumars fyrir þá sem fylgjast með framgangi þeirra. Ekki er allt búið ennþá. Segja má að hápunkturinn sé framundan.
- Á morgun hefur U18 ára landslið kvenna keppni á heimsmeistaramótinu sem fram fer í Norður Makedóníu. Keppni stendur yfir til 10. ágúst. Þess má geta að Ísland er í fyrsta sinn með á HM í þessum aldursflokki kvenna.
- Fimmtudaginn 4. ágúst verður flautað leiks á Evrópumóti 18 ára landsliða karla í Svartfjallalandi. Íslenska landsliðið verður með á mótinu sem lýkur 14. ágúst
- Talsverð eftirvænting ríkir vegna þátttöku liðanna tveggja, alltént á ritstjórn handbolta.is.
- Í dag leikur U17 ára landslið karla sinn næst síðasta leik á Ólympíuhátíð Evrópuæskunnar sem stendur yfir í Slóvakíu. Síðasti leikurinn verður á morgun laugardag. Þá hefur íslenska liðið leikið fimm leiki á sex dögum.
- Í fyrri hluta júlí tók U20 ára landsliðið þátt í Evrópumótinu sem haldið var í Porto í Portúgal. Liðið hafnaði í 11. sæti eftir að hafa leikið sjö sinnum á tíu dögum.
- Í lok júní og í byrjun júlí var U16 ára landslið kvenna með á Opna Evrópumótinu í Partille í Gautaborg. Hafnaði liðið 13. sæti.
- Í ágúst verða æfingabúðir hjá U16 ára landsliði karla á Akureyri.
- Í júní og júlí léku U16 og U18 ára landslið karla og kvenna vináttuleiki og voru þátttakendur í alþjóðlegum mótum til undirbúnings fyrir verkefni sumarsins.
- U20 ára landslið karla lék þrjá leiki á Opna Skandinavíumótinu áður en það lagði af stað á EM í Portúgal.
- Róbert Geir Gíslason framkvæmdastjóri Handknattleikssambands Íslands sagði í samtali við handbolta.is í sumar að útgerð yngri landsliðanna vorið og sumarið 2022 kostaði ekki undir 50 milljónum króna. Iðkendur safna fyrir um tveimur þriðju hlutum upphæðarinnar.
- Yfir 50 keppnislið barna og unglinga tóku þátt í Partille Cup handknattleiksmótinu í Svíþjóð í viku í byrjun júlí.
- Félagslið unglinga tóku þátt í æfinga- og keppnisferðum til Evrópulanda í júní.
- Vafalaust er þessi upptalning ekki tæmandi.
- Hver segir að það sé ekkert að gera í handknattleik yfir um sumarið?
ivar@handbolti.is
- Auglýsing -
