Patrekur Jóhannesson, þjálfari Stjörnunnar messar yfir sínum mönnum. Mynd/Ívar

„Þetta var erfiður leikur eins og við vissum áður en gengið var til hans. Grótta er með hörkulið sem er vel skipulagt og með góða leikmenn. Við máttum þess vegna vel búast við að vera í hörkuleik fram á síðustu stundu sem raun varð á,“ sagði Patrekur Jóhannesson, þjálfari Stjörnunnar, sæll á svip eftir sigur á Gróttu, 28:27, í Olísdeildinni í handknattleik í gærkvöld í TM-höllinni.


„Ég er ánægður með að okkur tókst að vinna þótt litlu mætti muna. Það sýnir að það er karakter í liðinu og um það snýst uppbyggingin meðal annars. Grótta hefur sýnt það í vetur að hún hefur á að skipa mjög frambærilegu liði sem hefur unnið sér inn virðingu á keppnistímabilinu. Þess vegna eru þetta tvö góð stig hjá okkur,“ sagði Patrekur ennfremur.


„Nánast allir leikir okkar í vetur hafa verið jafnir undir lokin nema viðureignin við Hauka þar sem við áttum engan möguleika og leikur við Val þar sem við voru með gott forskot í lokin. Í jöfnu leikjunum höfum við oft farið illa að ráði okkur undir lokin og orðið af stigum. Að þessu sinni náðum við að loka dæminu. Deildin er mjög jöfn,“ sagði Patrekur Jóhannesson, þjálfari Stjörnunnar.

Staðan í Olísdeild karla.

- Auglýsing -

Nýjustu fréttir

- Auglýsing -