Stolt Sachsen Bundesland

Díana Dögg Magnúsdóttir og samherjar í BSV Sachsen Zwickau halda ótrauðar sínu striki í þýsku 2. deildinni í handknattleik. Í dag lögðu þær grannliðið HC Rödertal, 31:29, á heimavelli og halda því áfram að sitja í öðru sæti deildarinnar og anda ofan í hálsmálið á Füchse Berlin er trónir á toppnum.

Díana Dögg og félagar voru með yfirburði í leiknum frá upphafi til enda og voru þær m.a. sex mörkum yfir í hálfleik, 18:12. Sterkri stöðu hélt liðið allt til enda þótt leikmenn HC Rödertal næðu aðeins að klóra í bakkann á síðustu mínútunum.

„Við fórum eins og svo oft áður niður á þeirra plan í stað þess að spila okkar bolta í seinni hálfleik,“ sagði Díana Dögg sem skoraði tvö mörk en var allt í öllu jafnt í vörn sem sókn.

„Þetta var líka svokallaðir „derby“ leikur sem maður vill auðvitað alltaf vinna eins og aðra leiki. Hver sigur er mikilvægur. Við fáum að bera stoltið í Sachsen Bundeslandi,“ sagði Díana Dögg Magnúsdóttir ennfremur létt í bragði að vanda við handbolta.is eftir leikinn í kvöld.