Stuðningsmenn Guif kvöddu Daníel Frey

Daníel Freyr Andrésson fagnar í kappleik með Guif í Svíþjóð. Mynd/Facebooksíða Guif Eskilstuna

Handknattleiksmarkvörðurinn Daníel Freyr Andrésson kvaddi stuðningsmenn sænska úrvalsdeildarliðsins Guif í fyrrakvöld eftir síðasta leik liðsins í úrvalsdeildinni á keppnistímabilinu. Hann var leystur út með gjöfum frá félaginu sem Kristján Andrésson, fyrrverandi landsliðsþjálfari Svía og núverandi íþróttastjóri Guif afhenti.

Eins og kom fram í desember sl. þá hefur Daníel Freyr samið um að leika með danska úrvalsdeildarliðinu Lemvig-Thyborøn Håndbold næstu tvö keppnistímabil. Tekur samingurinn gildi í sumar.

Daníel Freyr hefur verið í herbúðum Guif í Eskilstuna síðustu tvö ár. Hann þekkir vel til í sænskum handknattleik en auk þess að leika með Guif var Daníel Freyr í herbúðum sænska úrvalsdeildarliðsins Ricoh frá 2016 til 2019.

Í samtali við handbolta.is á dögunum sagði Daníel Freyr að það væri kominn tími til að skipta um umhverfi að takast á við nýjar áskoranir með því að færa sig um set yfir til Danmerkur eftir góð ár í Svíþjóð.

Guif hafnaði í níunda sæti sænsku úrvalsdeildarinnar á keppnistímabilinu og komst ekki í úrslitakeppnina. Daníel Freyr var með 30% hlutfallsmarkvörslu á keppnistímabilinu samkvæmt tölfræðisamantekt úrvalsdeildarinnar.

- Auglýsing -

Nýjustu fréttir

- Auglýsing -