- Auglýsing -

Styttist í brottför til Búdapest

Línurnar lagðar fyrir æfingu í Víkinni seinni partinn í dag. Mynd/HSÍ

Íslenska landsliðið í handknattleik æfði einu sinni í dag og fór æfingin fram í Víkinni eins og aðrar æfingar liðsins síðustu daga. Eftir því sem segir í tilkynningu frá HSÍ þá var hópnum skipt í tvö lið og leikinn nokkurskonar æfingaleikur.

Fyrr í dag hafði Guðmundur Þórður Guðmundsson á fundi með leikmönnum farið yfir helstu áherslur í sóknarleiknum í leikjunum sem eru framundan á Evrópumeistaramótinu en fyrsti leikur íslenska landsliðsins verður eftir fimm daga gegn landsliði Portúgals.

Guðmundur Þórður messar yfir leikmönnum á fundi í dag. Mynd/HSÍ


„Standið og staðan á strákunum er góð og allir lausir við alvarleg meiðsli,“ segir í tilkynningu HSÍ.


„Æfingarnar hafa gengið vel og spilið í dag var á köflum mjög gott. Hugarfarið hjá strákunum er gott og hungrið er til staðar. Nú notum við síðustu æfingarnar til að fínpússa okkar leik jafnt í vörn sem sókn,“ er haft eftir Guðmundi Þórði landsliðsþjálfara í fyrrgreindri tilkynningu.

MYnd/HSÍ


Í kvöld borða strákarnir svo saman og fara í meðhöndlun hjá sjúkraþjálfurum liðsins þeir sem það þurfa ásamt að gera sér eitthvað til skemmtunar.


Auk æfinga á morgun fer liðið m.a. í PCR próf áður en haldið verður til Ungverjalands á þriðjudagsmorgun.

- Auglýsing -
- Auglýsing -

Nýjustu fréttir

- Auglýsing -