- Auglýsing -
Markahæsti leikmaður kvennaliðs Aftureldingar á síðasta keppnistímabili, Sylvía Björt Blöndal, hefur framlengt samning sinn við félagið til næstu tveggja ára. Frá þessu er greint í tilkynningu handknattleiksdeildar Aftureldingar í dag.
Aftureldingarliðið mun þar með njóta krafta Sylvíu Bjartar í Grill66-deildinni á næstu leiktíð. Afturelding féll úr Olísdeildinni í vor eftir eins árs dvöl.
Sylvía Björt kom til liðs við Aftureldingu frá FH fyrir ári og varð markahæsti leikmaður liðsins í Olísdeildinni með 120 mörk. Hún var um leið næst markahæst í deildinni. Aðeins Jóhanna Margrét Sigurðardóttir úr HK skoraði fleiri mörk, 127.
Sylvía lék einnig stórt hlutverk í varnarleik Aftureldingar á síðustu leiktíð og því er áframhaldandi dvöl hennar ein alsherjar styrking undir stoðir Aftureldingarliðsins sem hyggst ekki staldra lengi við í Grill66-deildinni.
- Auglýsing -
