Handknattleikskonan Ragnheiður Tómasdóttir er komin til landsins og getur tekið upp þráðinn með FH-liðinu í Olísdeildinni þegar keppni verður framhaldið á nýjan leik.
Ragnheiður fór í læknisnám til Slóvakíu í byrjun september en skólanum var lokað á dögunum vegna kórónuveirunnar og þess vegna ekkert annað að gera fyrir hana en að snúa heim á nýjan leik hvar hún er í sóttkví um þessar mundir.
Ragnheiður var markahæsti leikmaður FH á síðasta keppnistímabili og þess vegna er um verulegan búhnykk að ræða fyrir FH-liðið að endurheimta hana. Hún var auk þess valin í æfingahóp landsliðsins í sumar sem leið.
Jakob Lárusson, þjálfari FH, var að vonum kampakátur með tíðindin þegar handbolti.is heyrði í honum fyrir stundu. Hann sagði að ef gangi allt að óskum ætti Ragnheiður að verða klár í slaginn með FH-liðinu þegar keppni í Olísdeildinni hefst á nýjan leik, vonandi fljótlega eftir 19. október.
„Ragga er ekki bara góð handknattleikskona heldur einnig góđur liđsfélagi og karakter,“ sagði Jakob.
„Við FH-ingar styðjum okkar leikmenn til að elta draumana. Þess vegna erum við undir það búnir að ef henni stendur til boða að fara aftur út í nám og munum greiða götu hennar í þeim efnum í einu og öllu,“ sagði Jakob sem eins og aðrir þjálfarar Olísdeildarliða á höfuðborgarsvæðinu má ekki stunda æfingar með leikmönnum sínum þessa dagana.
