Slóvenska landsliðið í handknattleik kvenna varð fyrir öðru áfalli í gær við undirbúning sinn fyrir Evrópumótið sem hefst í Danmörku á fimmtudaginn. Stórskyttan, Ana Gros, tognaði á nára og hætti æfingu áður en henni lauk. Gros er markahæsti leikmaður Meistaradeildar kvenna.
Fyrir helgina smitaðist besti línumaður slóvenska landsliðsins, Aneja Beganovic af kórónuveirunni og verður örugglega ekki með í riðlakeppni EM. Til viðbótar þá eru Elizabeth Omoregie og Nina Zulic í lamasessi þótt þokkalega góðar vonir séu fyrir að þær geti verið með á EM.
Of snemmt er að segja til um hvort Gros verður ekki með á EM en nárameiðsli eru alltaf erfið viðureignar.
Gros er helsta tromp landsliðs Slóveníu og því væri það mikið áfall fyrir landslið Slóvena verði Gros ekki með. Hún er lang markahæst í Meistaradeild kvenna með 62 mörk.
Slóvenar verða í riðli með Svartfellingum, Dönum og Evrópumeisturum Frakka og leika við Dani í fyrstu umferð á fimmtudaginn.
