Suður-Ameríkumeistararnir voru sterkari

Jin Watanabe leikmaður japanska landsliðsins sækir að vörn Argentínu í leiknum í dag. Mynd/EPA

Suður-Ameríkumeistarar Argentínu unnu japanska landsliðið, undir stjórn Dags Sigurðssonar, 28:24, í upphafsleik annars milliriðils á heimsmeistaramótinu í handknattleik karla í Egyptalandi í dag. Argentínumenn, með Diego Simone innanborðs, voru með yfirhöndina í leiknum í dag. Þeir voru með fjögurra marka forskot að loknum fyrri hálfleik, 17:13.


Argentína er komin með fjögur stig í riðlinum en liðið tók með sér tvö stig úr riðlakeppninni, þ.e. sigurinn á Barein. Japan hefur eitt stig en hefur þegar náð sögulegum árangri á heimsmeistaramóti með því að komast á annað stig keppninnar aðeins í annað sinn í sögunni og í fyrsta sinn með stig.

Japanska landsliðið mætir heimsmeisturum Danmerkur á laugardaginn og Barein á mánudag.
 
Halldór Jóhann Sigfússon og lærisveinar hans í landsliðið Barein mæta landsliði Króatíu innan stundar en lið þessar þjóða eru í riðli með Japan, Danmörku, Argentínu og Katar.

Síðar í kvöld eigast við heimsmeistarar Danmerkur og Katar. Á sama tíma leikur þýska landsliðið, undir stjórn Alfreðs Gíslasonar, á móti Evrópumeisturum Spánar en liðin eru í milliriðli eitt.

- Auglýsing -

Nýjustu fréttir

- Auglýsing -