- Auglýsing -

Súrt og svekkjandi að tapa

Mynd/Hafliði Breiðfjörð

„Súrt og svekkjandi að tapa leiknum,“ sagði fyrirliðinn Ýmir Örn Gíslason þegar handbolti.is hitti hann að máli eftir fjögurra marka tap íslenska landsliðsins fyrir Dönum í MVM Dome í Búdapest í kvöld í fyrstu umferð milliriðlakeppni Evrópumótsins í handknattleik karla.

„Mér fannst við eiga að geta gert betur í mörgum stöðum, ekki síst í vörninni í fyrri hálfleik. Vorum betri í þeim síðari og fengum aðeins á okkur ellefu mörk. Fyrir utan kafla í síðari hálfleik og tvö vítaköst þá var sóknarleikurinn flottur. Síðan fóru nokkur dauðafæri forgörðum. Við stóðum saman og féllum saman,“ sagði Ýmir Örn og var fremur vonsvikinn með tapið. Taldi möguleika íslenska landsliðsins hafa verið fyrir hendi þrátt fyrir þau skakkaföll sem hópurinn hefur gengið í gegnum síðasta sólarhringinn.

„Það var engin afstökum fyrir tapinu að nokkra hafi vantað. Við byrjuðum leikinn vel og vorum tilbúnir í slaginn en því miður þá duttum við aðeins niður eftir 20 mínútur og aftur eftir um það bil tíu mínútur í síðari hálfleik. Ég er afar stoltur af strákunum. Við börðumst allan leikinn, jafnt í vörn sem sókn og gáfumst aldrei upp þrátt fyrir mótvind. Ég hefði hinsvegar gjarnan viljað vinna leikinn þegar ég horfi til baka. Við hefðum getað gert ýmislegt öðruvísi og betur,“ sagði Ýmir Örn sem var fyrirliði íslenska landsliðsins í fyrsta skipti á ferlinum. Hann sagði það vera mikinn heiður.

Þvílíkur heiður

„Það er þvílíkur heiður að fá að vera fyrirliði og vera treyst fyrir því hlutverki að leiða strákana inn á völlinn og að standa í þessu með þeim utan vallar sem innan og sjá þá vaxa við hverja raun,“ sagði Ýmir Örn Gíslason, fyrirliði íslenska landsliðsins í samtali við handbolta.is í MVM Dome í kvöld.

- Auglýsing -
- Auglýsing -

Nýjustu fréttir

- Auglýsing -