Sveinbjörn heldur kyrru fyrir

Sveinbjörn Pétursson, markvörður. Mynd/EHV/Aue

Handknattleiksmarkvörðurinn Sveinbjörn Pétursson hefur skrifað undir nýjan eins árs samning við þýska 2. deildarliðið EHV Aue. Félagið greinir frá þessu og segir að þar með sé ljóst að hinn 33 ára gamli þrautreyndi markvörður verði í herbúðum liðsins fram á mitt næsta ár.


Sveinbjörn gekk á ný til liðs við EHV Aue sumarið 2020 eftir að hafa leikið með Stjörnunni frá árinu 2016. Sveinbjörn þekkti þá vel til innan Aue-liðsins þegar hann mætti til leiks á ný enda hafði hann leikið þar um fjögurra ára skeið, 2012 til 2016, með félaginu sem er í austurhluta Þýskalands.


EHV Aue er í þriðja neðsta sæti 2. deildar um þessar mundir en liðið hefur sótt mjög í sig veðrið í síðustu leikjum. Auk Sveinbjörns leikur annar Íslendingur, stórskyttan Arnar Birkir Hálfdánsson, með liðinu.

Fjöldi Íslendinga hefur leikið fyrir Aue á undanförnum áratug auk þess sem Rúnar Sigtryggsson þjálfaði það um árabil og hljóp síðast í skarðið fyrir þjálfarann Stephan Swat á síðasta vetri þegar sá síðarnefndi veiktist alvarlega af Covid.

- Auglýsing -

Nýjustu fréttir

- Auglýsing -