Svekkjandi að nýta ekki færin og vinna

Gunnar Magnússon þjálfari Aftureldingar var ekki alltaf ánægður með það sem fyrir augu bar i Hertzhöllinni í kvöld. Mynd/Eyjólfur Garðarsson

„Miðað við að Gróttumenn voru með boltann síðustu sekúndur leiksins er gott að hafa fengið annað stigið en við fengum áður tvö frábær tækifæri sem ekki tókst að nýta. Það var svekkjandi,“ sagði Gunnar Magnússon þjálfari Aftureldingar við handbolta.is eftir jafntefli, 28:28, Gróttu og Aftureldingar í Olísdeild karla í handknattleik í kvöld en leikið var í Hertzhöllinni á Seltjarnarnesi.


„Mér fannst herslumuninn vanta hjá okkur oft og tíðum í vörninni. Gróttumenn skoruðu mörg mörk eftir að dómararnir voru búnir að lyfta upp höndunum. Gróttumenn spiluðu vel úr þessari stöðu. Það er erfitt andlega og reynir mjög á menn að fá ítrekað á sig mark eftir að hafa staðið lengi í vörn,“ sagði Gunnar sem var vonsvikinn yfir að endaspretturinn nægði ekki til sigurs eins og t.d. gegn Selfossi um daginn. Afturelding var þremur mörkum undir í kvöld þegar skammt var til leiksloka en skorað fjögur af síðustu fimm mörkunum.


„Úr því sem komið er þá tökum við stigið,“ sagði Gunnar sem vildi lítið afsaka sig á að kvarnast hefur mjög úr hópnum hjá honum og t.d. er enginn örvhentur hornamaður. Ekki bætti úr skák að Gunnar Kristinn Malmquist fékk þriðju brottvísun þegar um stundarfjórðungur var til leiksloka.


„Fyrst og fremst þá féll lítið með okkur. Mér fannst menn leggja sig alla fram en því miður þá dugði það ekki til,“ sagði Gunnar Magnússon þjálfari Aftureldingar en lið hans er í fimmta til sjöunda sæti Olísdeildar með 18 stig eins og Stjarnan og Selfoss.

Ríflega tveggja vikna hlé verður nú á keppni í Olísdeild karla vegna úrslita í Coca Cola-bikarnum næstu daga og æfingabúða A-landsliðsins í næstu viku


Stöðuna í Olísdeild karla er að finna hér.

- Auglýsing -

Nýjustu fréttir

- Auglýsing -