„Við fengum heldur betur að vinna fyrir þessum stigum. Framarar voru góðir, léku hraðann og kraftmikinn handbolta. Seldu sig dýrt enda í baráttu um sæti í úrslitakeppninni. Við vorum staðir varnarlega en sýndum karakter og náðum að landa nokkuð öruggum sigri á síðustu mínútunum,“ sagði Aron Kristjánsson, þjálfari Hauka, í samtali við handbolta.is í Safamýri í kvöld eftir sex marka sigur Hauka á Fram, 35:29, í lokaleik 19. umferðar Olísdeildar karla.
Haukar eru þar með aðeins einu stigi frá deildarmeistaratitlinum.
„Við lékum góðan sóknarleik, fengum slatta af hraðaupphlaupum tókst að nýta okkur þau mistök sem Framarar gerðu á síðustu mínútunum. Framliðið lék af mikill ákefð og tók talsverða áhættu í sínum leik sem kom í bakið á þeim á lokasprettinum. Ég átti von á að okkur tækist að hrista þá af okkur fyrr vegna þess hversu mikla áhættu þeir tóku í sóknarleiknum,“ sagði Aron Kristjánsson sem nú fer á fullt að búa lið sitt undir grannaslaginn við FH í næstu umferð, eftir rétta viku í Schenkerhöllinni á Ásvöllum.
