- Auglýsing -

Syrtir í álinn hjá Zagreb

Kristjan Horzen skoraði þrjú mörk fyrir Celje í kvöld þegar liðið fagnaði sínum fyrsta sigri í Meistaradeildinni á keppnistímabilinu. Mynd/EPA

Ekki hefur gamla landsliðsmarkverði Króata, Vlado Sola, tekist að gera kraftaverk á stuttum starfstíma sem þjálfari Zagbreb-liðsins í handknattleik karla. Í kvöld má segja að syrt hafi enn frekar í álinn þegar liðið tapaði fimmta leik sínum í Meistaradeild Evrópu er Celje frá Slóveníu sótti króatísku meistarana heima. Celje vann öruggan sigur, 30:22, fagnaði þar með sínum fyrsta sigri í keppninni á leiktíðinni.

Zagreb-liðið situr sem fastast í botnsæti B-riðils án stiga og nokkuð ljóst eftir fyrstu leikina að liðið á talsvert í land áður en það getur gert sér vonir um að stigunum fjölgi á næstunni.

Leikmenn Celje gengu til búningsherbergja í hálfleik með tveggja marka forskot, 16:14. Þeir gerðu síðan út um leikinn í síðari hálfleik.

Aleks Vlah skoraði fimm mörk fyrir Zagreb-liðið og Matej Hrstic þrjú.

Tilen Kordin og Gal Marguc voru markahæstir hjá Celje með sjö mörk hvor.

Staðan, leikjafjöldi innan sviga: Barcelona 8(4), Veszprém 8(4), Aalborg 8(5), Kiel 6(4), Nantes 2(4), Celje 2(5), Motor 0(3), Zagreb 0(5).

- Auglýsing -
- Auglýsing -

Nýjustu fréttir

- Auglýsing -