Tandri Már Konráðsson átti stórleik þegar Stjarnan tók Val í kennslustund í Olísdeildinni í handknattleik í Origohöllinni á Hlíðarenda. Tandri Már skoraði níu mörk, átti fimm stoðsendingar og var með fimm löglegar stöðvanir í vörninni auk þess að verja tvö skot og stela boltanum einu sinni í átta marka sigri Stjörnuliðsins, 35:27. Óhætt er að segja að fyrirliðinn hafi farið fyrir sínu liði að þessu sinni.
Valsmenn komust aldrei yfir á heimavelli í kvöld. Stjarnan tók strax frumkvæðið og var með fjögurra marka forskot eftir 15 mínútur, 11:7. Forysta Garðbæinga var sex mörk að loknum fyrri hálfleik, 18:12.
Þegar kom fram í síðari hálfleik gáfu Stjörnumenn ekkert eftir. Varnarleikur Vals var slakur og markvarsla að sama skapi. Leikmenn Stjörnunnar juku forskot sitt og unnu öruggan sigur. Þeir hafa nú níu stig eins og ÍBV, KA og Fram og eru stigi á eftir Val sem er í fimmta sæti.
Mörk Vals: Magnús Óli Magnússon 6, Finnur Ingi Stefánsson 5/2, Stiven Tobar Valencia 5, Arnór Snær Óskarsson 4, Anton Rúnarsson 4, Andri Finnsson 2, Benedikt Gunnar Óskarsson 1.
Varin skot: Einar Baldvin Baldvinsson 5, 21,7% – Martin Nágy 4, 19%.
Mörk Stjörnunnar: Tandri Már Konráðsson 9, Dagur Gautason 7, Starri Friðriksson 5, Leó Snær Pétursson 3/2, Arnar Máni Rúnarsson 3, Ólafur Bjarki Ragnarsson 3, Pétur Árni Hauksson 2, Brynjar Hólm Grétarsson 2, Sverrir Eyjólfsson 1.
Varin skot: Adam Thorstensen 13, 33,3% – Sigurður Dan Óskarsson 0.
Öll tölfræði leiksins er á HBStatz.
