Tap á síðustu sekúndu

Felix Már Kjartansson t.v. og Ágúst Ingi Óskarsson. Báðir lék þeir við góðan orðstír hjá Neistanum í Þórshöfn í vetur. Mynd/Neistin

Íslendingatríóið hjá færeyska handknattleiksliðinu Neistanum mátti bíta í það súra epli að tapa fyrir Kyndli á síðustu sekúndu viðureignar liðanna í færeysku úrvalsdeildinni í handknattleik í gærkvöld, 26:25. Leikmenn Kyndils skoruðu sigurmarkið þegar ein sekúnda var eftir af leiknum en þeir voru tveimur mörkum yfir að loknum fyrri hálfleik, 13:11.


Ágúst Ingi Óskarsson skoraði fimm af mörkum Neistaliðsins og Felix Már Kjartansson fjögur. Arnar Gunnarsson er þjálfari Neistans sem hefur átta stig eftir 12 leiki eins og Kyndill sem rekur lestina í deildinni.

Leikmenn Neistans eru rétt að komast af stað við æfingar og keppni eftir að hafa verið í sóttkví og einangrun um tíma vegna smits kórónuveiru innan liðsins í lok nóvember.


H71 er í efsta sæti deildarinnar með 22 stig eftir 13 leiki. KÍF frá Kollafirði er þar á eftir með 18 stig að loknum 12 leikjum.

- Auglýsing -

Nýjustu fréttir

- Auglýsing -