- Auglýsing -
Björgvin Páll Gústavsson, markvörður íslenska landsliðsins í handknattleik og Íslands- og bikarmeistara Vals, segir að skorað hafi verið á sig að gefa kost á sér sem borgarstjóraefni í Reykjavík í sveitarstjórnarkosningunum í vor.
Björgvin greinir frá því að hann hafi vart rétt verið komin til landsins á laugardaginn þegar hann fékk símtal frá þjóðþekktum manni sem hann beri mikla fyrir virðingu fyrir. Hann hafi skorað á sig að gefa kost á sér.
Björgvin greinir frá þessu á Facebook-síðu sinni í morgun. „Þessi maður þekkir vel til minnar ástríðu fyrir málefnum barna og vildi sjá mig taka slaginn enda þyrfti að taka borgina og snúa við málum þar. Það skrýtna er að þessi hugmynd hljómaði einhverra hluta vegna ekki svo galin og ég er virkilega hrærður yfir þeirri trú sem þessi góði vinur hefur á mér,“ skrifar Björgvin Páll.
Ekki kemur fram fyrir hvað flokk maðurinn ætlar Björgvini Páli að gefa kost á sér fyrir. Alltént virðist Björgvin Páll ekki vera mjög fráhverfur hugmyndinni, hvað svo sem verður.
„En er ég efni í næsta borgarstjóra í Reykjavík? Ég hreinlega veit það ekki… Ef ég tæki slaginn þá væri það einna helst til þessa að taka þátt í byltingu er kemur að málefnum barna. Það að merkja X við B, fyrir Björgvin og börnin er eitthvað sem hljómar allavega vel,“ skrifar Björgvin Páll en tengill á færslu hans er hér fyrir neðan.
- Auglýsing -
