- Auglýsing -
- Teitur Örn Einarsson skoraði tvö mörk og átti fimm stoðsendingar þegar Flensburg vann Stuttgart, 28:26, í þýsku 1. deildinni í handknattleik í gær þegar leikið var í Porsche-Arena í Stuttgart. Viggó Kristjánsson var ekki í leikmannahópi Stuttgart og Andri Már Rúnarsson skoraði ekki að þessu sinni. Flensburg er í fjórða sæti með 48 stig þegar þrjár umferðir eru eftir óleiknar. Füchse Berlin er tveimur stigum ofar í þriðja sæti. Stuttgart er í 15. sæti af 18 liðum með 20 stig og er að mestu sloppið úr fallhættu.
- Pfadi Winterthur mætir Kadetten Schaffhausen, liði Aðalsteins Eyjólfssonar, í úrslitum um meistaratitilinn í handknattleik karla í Sviss. Winterhur vann Wacker Thun í oddaleik í undanúrslitum í gær. Winterthur er ríkjandi meistari í Sviss. Fyrsti úrslitaleikurinn verður í Schaffhausen á miðvikudaginn.
- Karen Hrund Logadóttir hefur gert tveggja ára samning við handknattleiksdeild FH. Karen Hrund, sem er á átjánda aldursári, var á láni hjá FH frá HK seinni hluta tímabilsins sem nú er nýlokið.
- Danski landsliðsmaðurinn Mathias Gidsel lék á ný með GOG í fyrrakvöld eftir að hafa jafnað sig af erfiðum hnémeiðslum sem hann varð fyrir í viðureign Dana og Frakka og þriðja sætið á Evrópumótinu í handknattleik í lok janúar. Í fyrstu var talið að Gidsel léki ekki meira á tímabilinu en batinn hefur verið skjótari og betri en búist var við. Gidsel gengur til liðs við Füchse Berlin í sumar.
- Pólska handknattleiksliðið Wisla Plock varð fyrir áfalli í vikunni þegar Niko Mindegia sleit krossband í hné í úrslitaleiknum við Vive Kielce um pólska meistaratitilinn á þriðjudagskvöld. Wisla leikur á morgun í undanúrslitum Evrópudeildarinnar við Benfica.
- Þýska landsliðskonan og leikmaður Borussia Dortmund, Alina Grijseels, var valin leikmaður ársins í þýsku 1. deildinni í handknattleik kvenna í árlegu vali þjálfara og fyrirliða í deildinni.
- Auglýsing -
