Berglind Þorsteinsdóttir lengst til hægri gengur af leikvelli í sínum fyrsta landsleik með Svíar fagna sigri. Mynd/EHF

„Þetta var erfitt. Maður vissi svo sem að sú yrði raunin enda hafnaði sænska liðið í fjórða sæti á Ólympíuleikunum í sumar. Við gerðum okkar besta í leiknum og þetta var niðurstaðan,“ sagði Berglind Þorsteinsdóttir sem lék sinn fyrsta A-landsleik í Eskilstuna í dag þegar íslenska landsliðið mætti því sænska í fyrstu umferð 6. riðils undankeppni EM og tapaði með 13 marka mun, 30:17.


„Það var gaman að fá tækifæri til þess að koma inn í liðið á móti svona sterkum andstæðingi í fullri höll af áhorfendum og frábærri stemningu,“ sagði Berglind sem er 22 ára gömul og leikur með HK í Olísdeildinni heima á Íslandi.


„Þrátt fyrir tap og leikurinn hafi reynst okkur erfiður þá lærir maður af þessu og öðlast um leið dýrmæta reynslu. Ég þarf að koma mér betur inn í leik okkar. Ég hef til dæmis ekki leikið 5/1 vörn í langan tíma. Persónulega fannst mér ganga ágætlega. Nú er bara hjá mér og stelpunum að byggja ofan á það sem við erum að gera,“ sagði Berglind er metur það m.a. sem svo að sjálfri vanti henni meiri styrk til þess að glíma við sænsku konurnar á jafnréttisgrundvelli.

„Þær eru mjög fljótar,“ sagði Berglind Þorsteinsdóttir, landsliðskona í handknattleik, sem heldur heim með íslenska liðinu til Íslands í fyrramálið þar sem næsti leikur bíður, gegn Serbum á sunnudaginn.

Handbolti.is er í Eskilstuna og fylgdist með leiknum í textalýsingu.

- Auglýsing -

Nýjustu fréttir

- Auglýsing -