Agnar Smári Jónsson tekur út leikbann á föstudaginn. Mynd/Egill Bjarni Friðjónsson

Annan leikinn í röð var Agnari Smára Jónssyni leikmanni Vals sýnt rauða spjaldið í kappleik í gærkvöld þegar Valsmenn sóttu leikmenn ÍBV heim í fyrri viðureign liðanna í undanúrslitum Olísdeildar karla í handknattleik. Að þessu sinni verður hann að súpa seyðið af broti sínu og taka út leikbann.

Bannið tekur hann út á föstudaginn þegar Valur fær ÍBV í heimsókn í Origohöllina til síðari viðureignar liðanna í undanúrslitum. Valur hafði betur í gær, 28:25.


Agnar Smári fékk einnig rautt spjald í viðureign Vals og KA á föstudagskvöldið. Dómarar leiksins mátu brot hans þá, sem var annars eðlis, ekki vera með þeim hætti að refsa bæri með leikbanni.


Nú er hinsvegar engin miskunn eins og lesa má í neðangreindum úrskurði aganefndar HSÍ sem birtist á heimasíðu HSÍ eftir hádegið. Skarð verður fyrir skildi hjá Valsmönnum vegna fjarveru Agnars Smára.


“Úrskurður aganefndar 9. júní 2021
Eftirtalin mál lágu fyrir og var tekið til úrskurðar:
Agnar Smár Jónsson leikmaður Vals hlaut útilokun með skýrslu vegna óíþróttamannslegrar hegðunar í leik ÍBV – Vals í Úrslitakeppni Olís deildar karla þann 8.6. 2021. Dómarar meta að brotið falli undir reglu 8:10 c). Með tilvísun í 10. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í eins leiks bann. Aganefnd vekur jafnframt athygli á stighækkandi áhrifum leikbanna, skv. 1. mgr. 11. gr. sömu reglugerðar.
Fleiri mál lágu ekki fyrir.
Úrskurðinn kváðu upp Sverrir Pálmason, Arnar Kormákur Friðriksson og Arnar Þór Sæþórsson.”

- Auglýsing -

Nýjustu fréttir

- Auglýsing -