- Auglýsing -

„Þetta er alveg glatað“

Elín Jóna Þorsteinsdóttir, leikur með danska úrvalsdeildarliðinu Ringkøbing Håndbold á næsta keppnistímabili. Mynd/Erik Laursen - aðsend

„Þetta er alveg glatað. Við vorum sendar heim. Liðið má ekki æfa saman næstunni,“ sagði Elín Jóna Þorsteinsdóttir, landsliðsmarkvörður í handknattleik við handbolta.is vegna fregna um að íþróttahúsi félags hennar, úrvalsdeildarliðsins Vendsyssel, hafi verið skellt í lás. Verður það ekki opnað aftur fyrr en 3. desember. Um er að ræða hluta af vörnum gegn meintu smiti kórónuveiru frá minkum í menn en mörg minkabú eru á norðurhluta Jótlands þar sem Vendsyssel er með bækistöðvar.


„Við verðum bara að æfa sjálfar og halda okkur í formi til að vera klárar þegar opnar aftur og við megum hittast og æfa handbolta,“ segir Elín Jóna sem býr í Álaborg þar sem reglurnar eru ekki í gildi af einhverjum ástæðum. Hún getur þar með sótt líkamsræktarstöðvar og haldið sér eitthvað við næstur vikurnar.


„Við vonum bara að ekki verði lokað öllu í Álaborg eins og alls staðar hér í kringum okkur,“ sagði Elín Jóna Þorsteinsdóttir, markvörður Vendsyssel.
Tveimur leikjum Vensdyssel á næstu vikum hefur verið frestað. Næsti leikur liðsins verður 30. desember gangi áætlanir eftir. Keppni í dönsku úrvalsdeildinni liggur niðri frá um 20. nóvember og fram yfir jól vegna þátttöku danska landsliðsins á Evrópumótinu.

- Auglýsing -
- Auglýsing -

Nýjustu fréttir

- Auglýsing -