Kristins Björgúlfssonar, þjálfari ÍR, og liðsmanna bíður þátttaka í Grill 66-deildinni á næstu leiktíð. Mynd/Egill Bjarni Friðjónsson.

„Þetta er munurinn á liðunum og það er alveg sama hvort þú berð saman byrjunarlið Selfoss sem á að verða Íslandsmeistari eða unga liðið þeirra og unga liðið okkar. Þeir eru komnir töluvert lengra en við,“ sagði Kristinn Björgúlfsson, þjálfari karlaliðs ÍR í samtali við handbolta.is í Austurbergi í kvöld eftir tíu marka tap ÍR fyrir Selfossi, 28:18, í viðureign liðanna í Olísdeild karla í handknattleik.


ÍR-liðið slapp vel með tíu marka tap því Halldór Jóhann Sigfússon tefldi fram yngri leikmönnum í talsverðum mæli þegar á leið leikinn. Staðan að loknum fyrri hálfleik var 14:7, Selfossi í hag.

Selfoss er þar með komið með 11 stig eins og FH og Afturelding í öðru til fjórða sæti en á leik til góða. Selfoss á sjö leiki að baki en hin tvö liðin hafa leikið átta sinnum. Haukar eru efstir með 12 stig eftir sjö leiki. ÍR rekur lestina sem fyrr án stiga eftir átta viðureignir.

Staðan í Olísdeild karla.

„Það er ekki langt síðan að enginn vildi þjálfa Selfoss-liðið og þeir héldu áfram að byggja á yngri leikmönnum sem voru í eldlínunni að þessu sinni. Handknattleiksdeild Selfoss heldur út frábæru starfi sem verður bara öflugra með hverju árinu,“ sagði Kristinn sem stendur í uppbyggingastarfi hjá ÍR um þessar mundir.


„Í dag lékum við eingöngu með uppalda ÍR-inga í síðari hálfleik. Flestir þeirra fæddust í kringum aldamótin. Við erum bara í baráttu við að halda áfram og erum hvergi bangnir. Næsti leikur verður á sunnudaginn við Aftureldingu,“ sagði Kristinn Björgúlfsson, þjálfari ÍR, hress og bjartsýnn að vanda.

Guðmundur Hólmar Helgason og Nökkvi Dan Elliðason, leikmenn Selfoss. Mynd/UMFS/SÁ


Mörk ÍR: Gunnar Valdemar Johnsen 3, Hrannar Ingi Jóhannsson 2, Andri Heimir Friðriksson 2, Dagur Sverrir Kristjánsson 2, Ólafur Haukur Matthíasson 2, Viktor Sigurðsson 2, Sveinn Brynjar Agnarsson 2, Logi Ágústsson 1, Tómas Starrason 1, Ólafur Atli Malmquist 1.
Mörk Selfoss: Sveinn Aron Sveinsson 7, Ragnar Jóhannsson 5, Atli Ævar Ingólfsson 4, Hergeir Grímsson 4, Einar Sverrrisson 3, Nökkvi Dan Elliðason 2, Hannes Höskuldsson 1, Tryggvi Þórisson 1, Arnór Logi Hákonarson 1.

Staðan í Olísdeild karla.

- Auglýsing -

Nýjustu fréttir

- Auglýsing -