- Auglýsing -

Þjálfari Íslendinga látinn taka pokann sinn

Steinunn Hansdóttir kom til Vensdsyssel á síðasta sumri. Mynd/Vendsyssel

Kent Ballegaard, sem þjálfað hefur danska úrvalsdeildarliðið Vendsyssel sem Steinunn Hansdóttir og Elín Jóna Þorsteinsdóttir leika með, var látinn taka pokann sinn í dag.

Vendsyssel kom upp í dönsku úrvalsdeildina í vor og hefur aðeins hlotið eitt stig í fyrstu sjö leikjum sínum. Þykir það óviðunandi að mati stjórnenda félagsins sem hafa ákveðið að grípa í taumana og láta þjálfarann axla sín skinn eftir tvö ár í starfi.

„Okkur vantar fleiri stig og þess vegna viljum við gera breytingar. Þess vegna förum við þessa leið,“ segir Christian Carlsen, formaður Vendsyssel í samtali við nordjyske.dk.

Stjórnendur félagsins leituðu þó ekki langt eftir nýjum þjálfara. Við starfinu tekur Thomas Kjær sem hefur verið aðstoðarþjálfari. Fyrsti leikur Vensdsyssel undir stjórn Kjær verður á heimavelli við København Håndbold annan laugardag.

Vendsyssel er nýliði í dönsku úrvalsdeildinni. Liðið vann 1. deild með talsverðum yfirburðum í vor.

Handbolti.is var með viðtal við Elínu Jónu markvörð Vendsyssel í síðustu viku.

- Auglýsing -
- Auglýsing -

Nýjustu fréttir

- Auglýsing -